ALLAH er kominn á nýjan bíl!

Ég ætla ekki að móðga neinn en ég sá núna í nýliðinni viku fallegan lítinn bíl með einkanúmerinu ALLAH og bætist þetta númer í flota margra missmekklegra einkanúmera sem ég hef séð. Ég veit ekkert hvort bíllinn tilheyrir múhameðstrúarmanni sem með þessu heldur uppi áróðri fyrir spámanninn eða hvort eigandinn hefur á þennan hátt sett merkið saman úr nafni sínu og upphafsstaf föðurnafns - það skiptir ekki máli en gefur mér tilefni til að minnast á einkamerki (einkanúmer heita auðvitað ekki einkanúmer í lögum heldur einkamerki!) og notkun þeirra.

Alþingi samþykkti árið 1996 að rétt væri að heimila notkun einkamerkja á tilteknum ökutækjum og jafnframt að gjaldið fyrir þau (í frumvarpinu sagði kr. 50.000 pr. númer) rynni til umferðaröryggismála.  Gjaldið varð kr. 25 þúsund í meðförum þingsins og er svo enn eftir því sem ég kemst næst nú 11 árum síðar.

Umferðarstofa annast eðli máls samkvæmt að úthluta einkanúmerum og settur er fyrirvari í umsóknareyðublað hjá stofnununinni um það hvaða áletranir mega vera á einkanúmerunum.  Þau mega ekki valda hneykslun eins og þar segir né heldur má áletrunin brjóta í bága við íslenskt málfar og tekið er fram að á endanum sé það eigandi þeirra sem ber ábyrgði á ef þau brjóta í bága við réttindi annarra.

Ég hef allt tíð haft efasemdir um einkanúmerin eins og þau hafa þróast hér.  Ég hef skilning á því að einhver vilji halda í gamla bílnúmerið sitt og finnst það nokkuð smekklegt en ýmsar áletranir eru það ekki að mínu viti og ég hef séð mjög mörg einkanúmer sem brjóta í bága við íslenskar málvenjur eins og ég skil hugtakið.  Einnig eru  þau sum þannig að það er erfitt að sjá með vissu hvað raunverulega stendur á númerinu.  Þannig man ég eftir að hafa séð efnafræðiformúlur og skammstafanir sem úr verður heil setning á ensku þegar að er gáð og svo auðvitað þegar menn raða saman mörgum samskonar stöfum (t.d.WWWWWW eða IIIIII) Erfitt getur verið að sjá í fljótu bragði hversu margir stafirnir eru eða jafnvel hvaða stafi er um að ræða þegar þeir raðast með þessum hætti saman! 

Auðvitað er gjaldtaka fyrir einkamerki umhugsunarefni en ég held að verðið sem hér er greitt 25 þúsund (auk framleiðslugjalds og fastakostnaðar, samtals tæp 30 þús), geti ekki talist mjög hátt.  Í nágrannalöndunum, þar sem einkanúmerin eru á annað borð leyfð, kosta þau margfalda þá fjárhæð eftir því sem ég kemst næst.  Kannski er það ekki heldur æskilegt - þau verða þá að einkamerkjum hinna ríku. 

Grunnspurningin er hins vegar þessi:  Til hvers þurfum við einkanúmer?

Og þá aftur að fyrirsögninni við þessu rafröfli:  Ætli einkanúmerið BUDDAH sé á lausu? Ég man ekki að hafa séð einkanúmerið GUÐ á bíl eða þá JESÚS! Það hlýtur að koma!

Athugasemdir

[Jóhann Pétursson (IP-tala skráð) 26.8.2007 kl. 22:12]

Skiptir máli hvað stendur á þessum einkamerkjum svo framarlega sem hægt er að lesa það jafn hratt og örugglega og um venjulegt fastanúmer væri að ræða?

Varðandi hugleiðingar þínar um hvort ALLAh, GUÐ ofl. þá minnir mig að ég hafi séð einkamerki þar sem á stóð POLICE. Er það áróður eða boðskapur?

[Jóhann aftur (IP-tala skráð) 26.8.2007 kl. 22:14]

Þarna átti auðvitað að standa .... hugleiðingar þínar um hvort ALLAH, GUÐ ofl., sé áróður þá minnir mig......

[Eiríkur Hreinn Helgason, 26.8.2007 kl. 22:57]

Sæll Jóhann og takk fyrir þetta - auðvitað er þetta bara sérviska í mér og þegar allt er skoðað þá skiptir þetta engu máli svo lengi sem hægt er að lesa númerið sómasamlega.  Þó kann að vera að einhvers staðar liggi mörkin, jafnvel þótt númerið sé vel læsilegt.  Hún Alla H á auðvitað að hafa sama rétt á að setja einkanúmer á bílinn sinn eins og Jón H eða Pétur H (JÓNH/PÉTURH).

Varðandi Polís-einkanúmerið þá vill svo til að ég þekki kollegann sem setti það á bílinn sinn (POLÍS1) en hann þjónaði í löggunni á Blönduósi lengi. 

Þeir norðanmenn láta nú ekki svona tækifæri frá sér fara og einn stríðnispúkinn þar, sem var frístundabóndi, auk þess að vera í löggunni, útbjó flott "einkanúmer" PÓLÍS2 og setti á mykjudreifarann sinn sem hann stillti upp við þjóðveginn, þeim fyrrnefnda til lítillar gleði. 

Það er um að gera að hafa gaman af lífinu!!! :)

[Jóhann (IP-tala skráð) 27.8.2007 kl. 08:29]

Blessaður Eiríkur. Jú ég er sammála því, að fyrst þessi aðferð við að auðkenna bílana var á annað borð leyfð, þá verði að vera ákveðið frelsi í því. Mér skilst þó að Umferðarstofa sé með einhverjar bremsur á vitleysunni og samþykki ekki allt sem fólki detti í hug. Ég sá þó í gærkveldi á leið minni heim einkanúmer sem var eitthvað á þessa leið. ZM-B35. Ég var góða stund að átta mig á því að þetta var ekki venjulegt fast númer heldur einkanúmer.  Má vera að það hafi verið gert til að rugla lögregluna í ríminu en ég sé engan annan tilgang með slíku númeri en útlit og stafir voru nákvæmlega eins og önnur venjuleg númer.

Annars er þetta líka bara röfl í mér gömlum skrjóðnum með ósýnilegt fastanúmer.

Þú svaraðir þó ekki spurningu minni, hvort Pólís númerið væri boðskapur eða áróður.